Yoruba Proverbs: The Good Person

Part 5: On consistency; honesty, openness, plain speaking, reliability

Ẹgẹ́ ò ṣákìí; ẹní bá bọ́ sábẹ-ẹ rẹ̀, a pa á kú pátá-pátá.

Ẹgbẹ̀tàlá: bí a ò bá là á, kì í yéni.

Ẹ-kòì-fẹ́-mi-kù, tó ta ajá-a rẹ̀ lókòó.

Ẹ̀là lọ̀rọ̀; bí a ò bá là á rírú ní ńrú.

Ẹ̀là lọ̀rọ̀; bóbìnrín bá jókòó a laṣọ bòbò.

Ẹlẹ́rìí ní ńyanjú ẹjọ́; ẹlẹ́rìí kì í ṣe elégbè.

Ẹ̀ẹ̀mejì letí ọlọ́jà ńgbọ́rọ̀.

Ẹni a kò fẹ́ nilé-e rẹ̀ ńjìnna lójú ẹni.

Ẹní bá sùn là ńjí, a kì í jí apirọrọ.

Ẹní gbé àrùn pamọ́ kọjá ore oníṣègùn.

Ẹni tí a nà ní kùm̀mọ̀ mẹ́fà, tó ní ọ̀kan ṣoṣo ló ba òun, níbo nìyókùú sọnù sí?

Ẹni tí ó sá là ńlé.

Ẹni tí ó bá máa jẹ́ Ọ̀ṣákálà a jẹ́ Ọṣákálá; ẹni tó bá máa jẹ́ Òṣokolo a jẹ́ Òṣokolo; èwo ni Ọ̀ṣákálá-ṣokolo?

Ẹni tí ó bá mọ ìṣe òkùnkùn, kó má dàá òṣùpá lóró; ohun a ṣe ní ńmúni-í rìnde òru; òkùnkùn ò yẹ ọmọ èèyàn.

Ẹni tí ó ṣe ojú kò da bí ẹni tó ṣe ẹ̀hìn.

Ẹni tí ó fẹ́ kúure, kó hùwà rere.

Ẹni tí ó sùn tó ní òún kú, tó bá jí, ta ni yó wìí fún?

Ẹni tí ó gbọ́n tó ńpurọ́; ẹni tó mọ̀ràn tó ńṣèké; ẹni tó mọ̀ pé nǹkan ò sí tó ńtọrọ; èwo ló sàn nínú àwọn mẹ́tẹ̀ẹ̀ta?

Ẹni tí ó gbépo lájà ò jalè bí ẹni tó gbà á sílẹ̀ fún un.

Ẹnìkan kì í yọ̀ kí ilẹ̀ ó sẹ́.

Ẹnu òpùrọ́ kì í ṣẹ̀jẹ̀.

Ẹnu-u rẹ̀ ní ńdá igba, tí ńdá ọ̀ọ́dúnrún.

Ẹran tí a kì í jẹ, a kì í fi ehín pín in.

Ẹ̀tàn kì í ṣe ọgbọ́n.

Ẹ̀wà yí kò dùn, ẹ̀wà yí kò dùn, àáṣó ìpàkọ́ ḿmì tìtì.

Ẹyẹlé ní òun ò lè bá olúwa òun jẹ, kí òun bá a mu, kí ó di ọjọ́ ikú-u rẹ̀ kí òun yẹrí.

.
Previous	Contents	Next